Proverbs 31
King Lemuel ko den
1Imi mu King Lemuel ko sinar den ko nuam nu maonam:2“Ni aninga kuriang, angamang motam nunguning.
Ani KARI BIYA kuriang ko ngatanguru lagerem se nu ni ani aisam.
Se ani ni ninguru ikiko iwita ka manorsam:
3Ni imet arungu ngual ngual me gerageko,
ale ka sail nungumik te me menawurko.
Imet uwutata mu ali sor supuling suen biya nunga maguwusan.
4“Lemuel, ikiko! Ali sor supuling mu nu yu waen me ta naukko nunguningkiri.
Ale yu aora naukko gomang me ta anirukko.
5Nu yu aora nauk ale ali sor ko munan den nungurman wore kuamili sapuruk,
se kariimet nungumik mel mena ninguru me nunga bituok bore ko.
6Yu aora se yu waen mu kariimet kuemonko negawasan agi kariimet ikup bibiya nunga ira muram se anisan bare nunga mel.
7Am namon ale kituwura guat ko bagasan wore ko nungamili sapuruk ale
ikup nongomang te aniso wore ko nungamili sapurukko.
Bare ni supuling agi mu yu aora mu me noko.
8“Ni kariimet nongota nunga ikup ko munakomonko me terong mu nunga sangaru ale nogo ko munakerko.
Ale ni sail tagir se den ariga kari munan diram la mu te kariimet nungumik mel mena mu nungumik te betemonko.
9Se tom ni keta karogo den ariga kari ko bager, mu ni munan diram te la bitarko.
Ale kariimet nungumik mel mena kituwura guat wore nunga sangaruko.”
Imet ningo ko munan
10Imet ko kilek munan suen biya ningo nunguningkiri mu kupa ale ariga ta ko ikup biya.Se kari awiriya imet uwuta mu arigiso ale taso, mu nu mel bo ningo nunguningkiri wore tam ale ago bagoso iwita.
11Se noko kuari nu ko gomang ningi nunguning aso,
ale mel ningo bo me ko tukunang aso.
12Se tom imet mu marak baga lagoso,
mu nu ko kuari gomang ikup me tuso, pempem sangaru lagoso.
13Nu tom suen biya ko kitak mayang ela se guang biri se lagoso.
14Nu dal bibiya saki na inang awar gisan ale ago taisan turan,
giarum bibiya ningi laga awar na inang giso ago taiso kawam tugu awuso.
15Nu worem me basuso la, barasoso ale kuriang nunga na kamoso,
ale ko ura imet anapeya ura betemonko mu nunga manarso.
16Nu ali ko loagoso ale diaso,
ale manga tagiso mu te waen bisek diaso ale aguso.
17Nu ura kowar imet, imet sokel ago,
se pempem la ura ilu se lagurukko kueso.
18Nu ko ura mel beteso mu ninguru ko sinar taso se manga ninguru tagiso.
Se ko galep mu me iruwuso, turom mu ago te ura iluso.
19Nu kota ko mayang kitak te elerukko mu irukuso,
ale te kitak suwali yawara yawara eleso.
20Nu kariimet nungumik mel mena se mel ko kuawara mu nunga sangarso ale mel saki nungaru guruguso.
21Nu tuwik daula biya kaposo mu ikia me moso,
mu awuk, ko kuriang guang nungumik te eremonko mu karogo.
22Nu anira kuwim kawam te aniso mu ko guang biriso nungurso,
ale nu kota ko guang nagurokko mu guang ningo ningo siraram se diriyam mu te biriso.
23Se ko kuari mu kari nup ago.
Nu wonong kariimet nunga supuling bo tala.
24Noko imet mu guang saki se mayang nunulan te kaola ko mu nungurso,
ale sor awar te diaso.
25Nu imet sokel ago, se kariimet nup patowasan.
Nu mel aguwaya maingte aratukko mu nu me ko nguangoso.
26Noko den balso mu ikia ago, se ekeseng te balso ale
ikia ningo saki alo nunga kasurso.
27Nu ura yawarakala taso, ale ko kawam naung se
ko kuriang se ko kuari nunga meltutuk suen biya ninguru ko sinar taso.
28Se ko kuriang mu nunga nunam ko amilmilasan,
se ko kuari mu ko nuwus nup patawoso.
29Ale iwita manarso, “Imet suen biya tala nunga nugari nunga kuriang nunga kawam sor ko bitua yawara betesan,
bare imet mu suen la nunga ningi ni keta imet gira nunguning.”
30Imet saki nunga den bala welang ago,
bare nunga nongomang ningi mu kigilik aniso.
Se aking nunga ariga yawara aitak aniso mu kam maiya biya me anirukko.
Bare imet nu Kaem kuring bowa ningi baga se nup patawoso,
umutang imet ningo, se kariimet nu nup patawomonko terong.
31Se ana noko kilek ningo mu ko ikinak ale ko ura ningo beteso mu ko nup biya tunakko.
Se kariimet nunga biguwura kuwim mu te nup am patawomonko.
New Testament
Copyright information for
WSK